BUTUAN CITY – Aminado si Senate President pro-tempore Jinggoy Estrada nga malabo nang mu-abante sa Senado ang gilutong impeachment sa House of Representatives batuk kang Vice President Sara Duterte. Sigon ni Estrada, duha ka semana na lang, mag-adjourn na ang Kongreso ug sunod tuig na sila mubalik.
Gawas niini, malabo nga magpatawag sila og special session aron makapahigayon og impeachment trial batuk sa besi presidente.
Saysay sa senador nga base sa Konstitusyon, ang pangulo maoy magpatawag og special session sa Kongreso alang sa maong katuyuan apan una na kining namahayag nga iya nang gipahunong ang mga lakang nga nagtinguha sa pagpa-impeach sa besi presidente.
Samtang gibutyag sa igsoon niining si Senador JV Ejercito nga maghulat na lang sila kung unsa ang dagan sa impeachment proceedings sa kamara. Apan mas maayong muhimo og laing solusyon aron mawala na ang ka-init sa pulitika tungod kay maka-apekto matud pa kini sa nasud ug sa katawhang Filipino ang political instability. Dili usab siya sigurado kung duna ba’y igong oras ang kamara pagpalabang sa maong impeachment complaint.
