BUTUAN CITY – Nanawagan si United States President Joe Biden sa tanang katawhan sa ilang nasud nga ipalurang na ang ka-init sa tensyong hatud sa away sa pulitika, karong duna na’y klarong mananaog pinaagi ni Republican President-elect Donald Trump.
Namulong gikan sa White House si President Biden kaganinang alas-12:00 sa kaadlawon, oras sa Pilipinas kansa mao ang unang pag-atubang ni Biden sa publiko human midaug ang iyang hugot nga karibal kaniadto sa presidential election ug napildi ang iyang kapartido nga si Vice President Kamala Harris sa bag-ohay lang natapos nga 2024 US Presidential elections.
Sumala ni Biden, magpabiling magtunhay ang kagustuhan sa katawhan sa pagpili sa bag-ong lider sa ilang nasud kansa pamatood sa demokrasya. Gilakbitan usab ni Biden ang pagtawag niya kang Trump, aron pagtimbaya niini dayong pasalig nga manduan ang tibook administrasyon nga seguruhon ang hapsay ug malinawon nga transition.
Samtang gidayeg usab niini ang iyang besi-presidente nga maoy midagan sa pagka-pangulo.
Gi-awhag usab ni Biden ang katawhan nga mukalma na gikan sa init nga piniliay og dili kwestyunon ang integridad sa election tungod kay kini transparent, patas, walay limbong og kasaligan. Mihatag usab kini og respeto sa tanang election workers diin kasagaran mga volunteers nga angayan lang pasalamatan.
Gi-anunsiyo usab niini nga karung Enero 28, himoon ang malinawon nga pagbalhin sa gahum sa Amerika ngadto sa midaug nga si Trump.
