BUTUAN CITY – Magduso og resolusyon karong adlawa si House Deputy Majority Leader, ACT-CIS partylist Rep. Erwin Tulfo, aron imbestigahan ang PHILSAGA Mining Corp. sa Agusan del Sur tungod sa paglapas niini sa katungod sa Indigenous Peoples (IPs) sa ilang yutang kabilin sa Brgy. Consuelo ug San Andres, lungsod sa Bunawan.
Ang nasangpit nga resolusyon, mag-awhag unya sa Committee on Indigenous Cultural Communities and Indigenous Peoples ug sa Committee on Natural Resources sa Kamara sa paghimo ug hini-usang pakisusi isip aide of legislation aron pagpalig-on sa Republic Act 8371, o ang Indigenous Peoples Rights Act of 1997.
Sumala ni Tulfo, nakadawat ang iyang buhatan og reklamo gikan nila Mary Jane Rodrigo-Hallasgo ug Amatorio Rodrigo kansa nagrepresentar sa mga pamilya Rodrigo sa Bunawan, mga lumad nga Manobo, kinsa nanag-iya ug nagpuyo sa yuta sa Consuelo ug San Andres, Bunawan, Agusan del Sur.
Base sa reklamo, gi-ilog matud pa sa minahan gikan kanila ang yutang kabilin. Sa draft resolution, ang mga magbabalaod mipadayag nga ang Pilipinas nag-ila ug nanalipod sa katungod sa mga Indigenous Cultural Communities (ICC) sa ilang mga yutang kabilin, ug nagmando sa estado sa pagpatuman sa mga prinsipyo sa agrarian reform ug pagdumala sa natural nga resources.
