BUTUAN CITY – Tulo ka buwan human unang gidangop dinhi sa Bombo Radyo Butuan, subling gidangop sa mga residente sa Purok 5, Sitio Luksuhon, Brgy Los Angeles ning siyudad ang subling pagsi-aw sa bagang duot sa mga langaw sa ilang lugar.
Sigon sa reklamanteng si Allan Peregrino, nagsugod ang fly infestation ning mi-aging adlaw dihang nagsugod na sa ilang pag-harvest sa mga binuhing manok ang Centro poultry farm. Sigon ni Peregrino, dili mahimong ipasangil sa mga binuhing baboy sa ilang lugar ang pagdagsa na usab sa mga langaw tungod kay kaniadto pa nila nasinatian nga kada-harvest season sa maong manukan, mao usab ang paggara sa mga langaw nga naghatag og kahasol sa ilang indlaw-adlaw nga paglihok-lihok. Kini ilabina nga bisan asa na lang kini manugpa ilabina panahon sa ilang tingkaon.
Ila na matud pa kining gipa-abot nga reklamo ngadto sa City Health Office uban sa pirma sa gibana-banang 50 ka mga mulupyo sa ilang purok aron ma-aksyunan.
Mipasalig usab matud pa ang ilang mga barangay officials nga sila na ang mag-follow up sa ilang reklamo apan hangtud karon, wala sila’y nakitang aksyon rason nga padayon gihapon nilang nasinatian ang susamang problema.
Gidugang pa ni Peregrino, ang balik-balik matud pa nila nga reklamo nga wala’y aksyon sa ilang mga barangay officials ang hinungdan nga ila na kining gipa-abot ngadto sa city government sa pangindahay nga mahatagan na kini og kasulbaran.
Dismayado na usab sila sa kanunay nga pangulipas sa ilang mga barangay officials ug pagbarog nga minimal lang matud pa ang maong problema tungod kay susihon lang matud pa sa mga niini ang ilang area human sa harvest season.
