BUTUAN CITY – Posible matud pa nga duna’y election angle sa 2027 National Expenditure Program, karong gisugdan na ang deliberasyon niini ilabina nga ang mag-apruba unya niini mao man si Pangulong Ferdinand Marcos Jr.
Sa eksklusibong pakighinabi sa Bombo Radyo Butuan, giklaro ni Professor Danilo Arao sa University of the Philippines ug convenor sa election watchdog nga Kontra Daya nga karon pa lang, kinahanglan nang bantayan sa tanan ang deliberasyon ilabina ang discretionary funds nga usahay tawgong pork barrel, ug uban pang mga termino.
Gipadayag ni Professor Arao nga kung tan-awon ang specific data sa pipila ka unibersidad, makita ang pagkunhod sa budget sa edukasyon apil na sa mga higher institutions.
Kung unsa matud pa ang trend ning mi-aging mga tuig alang sa edukasyon, klarong ma-utro na usab sa 2027 budget deliberation kansa duna matud pa’y dakong impact sa Maintenance and Other Operating Expenses kon MOOE ingon man sa capital outlay. Kini matud pa ang rason nga duna’y mga school buildings nga dili gihapon matapos ang konstruksyon.
Dugang pa ni Professor Arao, kinahanglang mahimong transparent, accountable, ug democratic ang paggamit sa pondo sa gobyerno. Importante usab nga masubay sa publiko kung asa padulong ang national budget ug dili kini gamiton sa paagi nga makahatag og dili patas nga political advantage sa mga incumbent officials.
Kini nga kabalaka konektado sa ilang mi-aging mga findings nga ang paggamit sa government resources alang sa partisan o electoral gain, usa ka seryosong problema sa democratic process ug wala madapat sa angayang dapatan sama sa nahitabo sa sektor sa edukasyon.
