BUTUAN CITY – Gipaniguro sa Armed Forces of the Philippines (AFP) nga dili magpatarog ang Pilipinas sa mga hulga ug pagpang-bully sa China Coast Guard sa may West Philippine Sea tungod kay nagpabiling lig-on ang ilang misyon nga protektahan ang katungod sa atong nasud ug ug siguraduhon ang kaluwasan sa tanan nilang mga sakop ug ang katawhan nga anaa sa West Philippine Sea.
Kini human nagpagawas og anti-trespassing policy ang China nga ipatuman ugmang adlawa June 15.
Sigon ni AFP Public Affairs Office (PAO) Chief Col. Xerxes Trinidad, ipadayon sa militar ang ilang maritime patrol sa mga lugar nga sakop sa Pilipinas.
Gipadayag ni Trinidad nga ang anti-trespassing policy sa China maoy muguba sa rule of law ug sa internasyonal nga mga sumbanan nga nagdumala sa maritime conduct.
Dugang pa ni Trinidad, ang presensiya ug aksyon sa Chinese vessels sa West Philippine Sea partikular sa teritoryo sa nasud, ilegal, pugsanon, agresibo, ug malinglanghon.
Una nang gipadayag ni Defense Secretary Gilberto Teodoro nga wala’y hurisdisyon ang China sa teritoryo sa nasud.
