BUTUAN CITY – Gihingusgan karon sa grupong Malusog at Matalinong Bata kon MMB Coalition nga ikonsidera sa gobyerno ang ilang hangyo nga First 1,000 Days Grant aron matabangang masolusyunan ang usa sa mga dakong problemang ilang nakita karon sa nasud, ang kaputot sa usa sa matag-upat ka mga bata alang sa ilang edad kansa base sa ilang pagtuon, delikado.
Kini tungod kay ang mga batang kulang sa height, mao kadtong late kanunay sa klase, mas gamay ang kita sa ilang paghamtong ug mas taas ang posibilidad nga magka-diabetes ug duna’y hypertension.
Sukwahi kini sa mga batang normal ug himsog nga napruybahan usab sa pagtuon nga tambok ang utok kumpara sa mga batang putot nga gamay lang ang utok.
Sa eksklusibong pakighinabi ning sibyahan, gibutyag ni Justin Muyot sa Malusog at Matalinong Bata kon MMB Coalition, nagtuo silang katungod sa matag-bata ang magdako nga himsog ug utukan.
Importante matud pa ang unang 1,000 ka mga adlaw alang sa usa ka bata gikan sa pagsabak kaniya hangtud na sa pag-abot niya og dos-anyos tungod kay dinhi mahitabo ang pag-develop sa ilang utok.
Higayong ma-aprubahan, ipa-ilalom kini sa Pantawid Pamilyang Pilipino Program kon 4Ps matutukan ang nutrisyon sa bata nga maka-apekto og dako sa iyang brain development.
Higayong ma-aprubahan ang ilang sugyot, ang mga babayeng buntis ug kadtong duna’y anak nga dos-anyos pa-ubos, i-apil na sa 4Ps ug madugangan unya ang ilang panggasto sa pagpa-check, apil na ang pag-atiman ug pagpakaon sa bata provided nga regular ang ilang pagpa-check up.
Ilalom unya sa ilang sugyot, magdako ang bata nga himsog ug utukan rason nga maayo unya sila sa klase ug sigurado na ang pagbaton usab nila og maayong kaugmaon.
