BUTUAN CITY – Business as usual gihapon ang New York bisan pa man sa nagkadako nga pro-Palestinian protests sa mga estudyante sa Columbia University ug City College of New York dihang gi-ronda kini sa police officers.
Sa eksklusibong pakighinabi sa Bombo Radyo Butuan, gipadayag ni Bombo international correspondent Annjo Moste Balbutin direkta gikan sa Manhattan, New York diin siya nagtudlo ug nahimutang ang Columbia University, nga dili sila apektado sa maong mga lihok protesta ilabina nga daan na matud pa kining duna’y history sa mga student protests.
Sigon ni Balbutin, dugay na matud pa ang maong pro-Palestinians protests ug nagkadako lang tungod kay gusto sa mga estudyante nga klarong kondenahon sa kagamhanan sa Estados Unidos ang padayon nga pag-atake sa Israel ngadto sa mga Palestino sa Gaza Strip.
Ang mas gikasuko sa mga estudyante mao ang padayong pagsuporta sa Amerika ngadto sa Israel taliwa sa dayag nga pagpamatay matud pa niini sa mga sibilyan ilabina dihang nadiskubrehan ang mga mass graves diin gipanglubong ang kapin sa 300 ka mga tawo. Giklaro usab ni Balbutin nga sagol-sagol nga rasa ang nagprotestang mga estudyante tungod kay dili lang kini mga Palestino.
Misulod na matud pa ang mga pulis human nga wala na makaya pa sa mga university security forces ang nagkadakong rali ilabina nga pila ka semana nang nagkampo ang mga estudyante sulod sa perimeter sa maong tunghaan ug mihimo na og mga criminal acts sama sa pagsulod na sa mga estudyante ang usa ka building.
Sa pagkakaron, dili pa makasulti si Balbutin kung kanus-a mahuman ang maong mga protesta apan sa iyang panglantaw kung magpadayon ang ang pag-atake sa Israel ngadto sa Gaza, dili gihapon muhunong sa ilang kawsa ang mga estudyante nga gusto lang mahatagan og kalinaw ang mga Palestino.
Sa pagkakaron, wala pa siya’y personal nga ka-ilang Pinoy nga misalmot sa rali gawas lang sa duha ka anak sa iyang ka-ila.
