BUTUAN CITY – Hilom na karong adlawa ang Israel human ang sunod-sunod nga pagtira og mga drones ug missiles sa Iran kagahapong adlawa.
Sa eksklusibong pakighinabi sa Bombo Radyo Butuan, gipadayag ni Bombo international correspondent Rey Borromeo, taga-Digos City, Davao del Sur, nagtrabaho siya isip caregiver sa Be’er Sheba, sa Negev Region diin naka-station ang mga artilleries ug mga eroplanong panggiyera sa Israel rason nga madungog niya ang mga mulupad nga eroplano ug mga missiles.
Kini matud pa ang rason nga kung duna’y mubuto nga mga bomba o kaha maglusad og air strike ang Israeli Defense Force, daw anaa lang kini sa iyang likod.
Dihang mi-atake na ang Iran, wala na matud pa siya makatulog ug gi-andam na lang ang iyang passport ug kwarta apil ang emergency bag diin atua na ang tanan niyang kinahanglanon.
Ang iya lang gikasubo niadtong higayuna tungod kay dihang iya nang dalhon unta sa bomb shelter ilalom sa balay ang iyang amo, nagdumili kini pag-uban rason nga iya na lang kining gipahibalo ngadto sa mga anak sa iyang amo ug siya na lang ang mitago.
Kinahanglan matud pa nga 15-minutos human sa pagtingog sa sirena, manago na sila aron kung duna’y bomba nga dili ma-intercept, dili sila ma-igo apil na sa mga tipaka sa missiles ug mga bombang ma-intercept tungod kay delikado gihapon kini sa kinabuhi.
