BUTUAN CITY – Angayan lang nga imbestigahan sa Commission on Elections kon COMELEC ang nabani-og karon nga duna na matud pa’y nanghatag og tag-usa ka gatus ka pisos ngadto sa mga rehistradong botante nga mipirma sa mikaylap nga form sa kabaranggayan aron magamit sa gihingusgan sa daghang mga magbabalaud nga charter change pinaagi sa people’s initiative.
Sa eksklusibong pakighinabi sa Bombo Radyo Butuan, gibutyag ni Constitutional law expert James Reserva nga kagawasan sa tanang indibidwal apil na sa mga organisasyon ang paglusad og signature campaign alang sa maong katuyuan apan kung hisgutan na ang gika-ingong suhol rason nga gibansagan na hinuon ang maong inisyatiba nga ‘peso initiative’, kinahanglan na kining tutukan.
Sigon ni Atty. Reserva, ang maong lakang ilegal ug kalapasan sa Omnibus Election Code nga dili angayang palabyon tungod kay makonsidera kining vote buying kansa usa ka criminal offense.
Gani kini matud pa ang hinungdan nga duna na’y giduso nga resolusyon sa Senado aron kini ma-imbestigahan.
