BUTUAN CITY – Gikumpirma ni Rodel Deligero, office-in-charge kon OIC-designate sa Overseas Workers’ Welfare Administration kon OWWA-Caraga nga wala pa sila’y nadawat nga mga hangyo gikan sa bisan asang parte ning rehiyon aron mahatagan og tabang ang ilang mga kabanay nga atua sa Israel.
Kini subay na sa posibilidad nga duna’y mga Caraganons nga nagtrabaho sa maong nasud ingon man sa Gaza Strip tungod kay ubay-ubay matud pa nga mga overseas Filipino workers koN OFWs ang atua sa maong gubot nga rehiyon.
Sa eksklusibong pakighinabi sa Bombo Radyo Butuan, gipadayag sa opisyal nga andam silang makig-alayon sa ilang sentrong buhatan higayong duna’y Caraganon nga ma-monitor nilang atua sa Israel ug manginahanglan og tabang sa ingon, ila gilayong ma-aksyunan.
Gidugang pa ni Deligero nga andam silang mutabang kung duna’y repatriation nga himuon ilabina sa mga apektadong lugar apan kini mag-agad matud pa gihapon sa mga hingtungdang overseas Filipino workers.
Kini gawas lang matud pa kung mandatory na ang himuong repatriation sa nasudnong kagamhanan alang sa ilang kaluwasan.
