BUTUAN CITY – Gikumpirma ni forester Jess Ivan Saburao, ang supervising environmental management specialist sa City Environment and Natural Resources Office kon CENRO-Butuan, nga dili pa isyuhan og environmental clearance ang duha ka mga poultry farms sa Brgy. Cabcabon ning siyudad hangtud nga dili nila ma-comply ang mga rekisitos nga gikinahanglan alang unya sa ilang operasyon.
Kini subay pa gihapon sa reklamo sa katawhan sa maong barangay nga tungod sa wala pagsubay sa balaud nga operasyon sa RD Agro Industrial Farm Development Corporation ug sa Putian and Tan Agro-Industries Incorporated, miresulta kini sa paglupad-lupad sa daghan kaayong langaw nga naka-apekto na sa inadlaw-adlaw nga pagpakabuhi sa katawhan sulod na sa pila ka buwan.
Sa eksklusibong pakighinabi sa Bombo Radyo Butuan, gibutyag ni Saburao nga nag-unang isyu nga ilang gitutukan mao ang pagkaylap sa daghan kaayong langaw nga mao usa’y unod sa hangyo sa barangay council nga inspeksyunan ang duha ka manukan.
Gani ang pagkaylap sa mga langaw wala lang nila gisusi sa Brgy. Cabcabon kondili apil na sa kasikbit nga mga barangay nga nasuta nilang apektado usab sa hugaw nga operasyon sa maong mga manukan.
Sa pikas bahon, klaruhon pa ni Cabcabon Brgy Kapitan Manuel Sison Jr. ang iyang nasagap nga impormasyong mihimo na og signature campaign ang katawhan sa matag-purok sa ilang barangay tungod gihapon sa problema sa mga langaw.
Sa eksklusibong pakighinabi ning sibyahan, gibutyag sa kapitan nga padayon ang ilang paningkamot nga mahatagan na og katapusan ang maong problema nga dugay nang gi-antus nilang tanang mga residente.
Kini matud pa ang hinungdan nga bisan og duna’y gihimo usab nga mitigating measures ang maong mga kompanya, wala gihapon nila kini hatagi og permit samtang dili pa mu-isyu og environmental clearance ang City Environment and Natural Resources Office kon CENRO-Butuan.
