BUTUAN CITY – Gi-andam na sa legal team ni kanhi Butuan City Mayor Dr Ferdinand Amante Jr. ang pagduso og motion for reconsideration o motion for no-trial ngadto sa Sandiganbayan aron mabaliktad ang hukom sa Sandiganbayan 3rd Division nga 16 ka tuig nga pagkabilanggo.
May kalabutan kini sa paglapas niini sa Sections 3(e) ug 3(g) sa Republic Act 3019 kon mas nailang Anti-Graft and Corrupt Practices Act tungod sa procurement ug shipment sa usa ka depektusong computerized tomography kon CT scan machine nga nagkantidad og 15-milyunes pesos gikan sa Estados Unidos.
Sa eksklusibong pakighinabi sa Bombo Radyo Butuan, gipadayag ni Atty. Froi Montero sa eksklusibong pakighinabi ning sibyahan, dili pa final and executory ang maong hukom diin gihatagan sila og 15 ka adlaw alang sa pag-apela niini.
Dako ang pagtoo ni Atty. Montero nga mabaliktad nila ang hukom tungod kay nabuhat na nila kini sa Court of Appeals nga kaniadto naghukom og perpetual disqualification to hold public office kang Dr. Amante.
Pasabot pa sa abogado nga sa ilang pag-apela, nakita sa court of appeals nga usa ka simple misconduct lang ang nahimo ni Dr. Amante dihang naghatag kini og cash advance sa procurement sa makina ug dili niya sala ang katibuk-ang transaction tungod kay duna’y ordinansa nga nagtugot kaniya.
Dugang ni Atty. Montero, gikan sa perpetual disqualification nga makahawid og katungdanan sa gobyerno, gihimo na langkining usa ka bulan nga salary penalty.
Ang nasangpit nga disesyon sa Court of Appeals maoy ilang dalhon matud pa sa Sandiganbayan 3rd Division sa ilang pag-apela ug ugaling dili sila paboran, isang-at nila kini sa korte suprema aron hatagan og katin-awan sa maong kaso.
