BUTUAN CITY – Naglusad karun og lawom nga imbestigasyon ang kapulisan sa nakaplagang patay’ng lawas sa usa ka 14-anyos nga dalaga nga gitoohang gilugos og gipatay sa Lingig, Surigao Del Sur.
Sa impormasyong nakuha ning sibyahan, nakaplagan kaganinang alas 2:00 sa hapon ang patay’ng lawas sa kasagbutan ilalom sa kalubian sa may Purok-2b, Barangay Poblacion, sakop sa maong lungsod. Nakit-an kini nga nagbuy-od sa mga linemen sa usa ka telecommunication company nga nagtaod og linya.
Naila ang biktima nga si Maria Bandayanon nga taga Purok-5, sa maong barangay. Sumala pa sa inahan nga nananghid ang iyang anak nga mamista og mangdisco sa tapad nga barangay.
Natingala nalang sila kay wala na kini makauli og dili na usab makontak hangtud nalang nakit-an ang patay’ng lawas.
Gitoohang gilugos matud pa kini tungod kay wala nay sapot sa pang-ubos ang biktima apan padayong gihulat sa karun ang kumpirmasyon sa SOCO sa unsay gikamatyan niini.
