BUTUAN CITY – Dakong kalipay ang gibati ni Rielle Jay ‘RJ’ Tanaman ilabina sa iyang mga ginikanan nga taliwa sa ilang pagpasa-op, makagradwar siya with flying colors human nga mitapos isip magna cum laude sa Father Saturnino Urios University kon FSUU sa kursong Bachelor of Secondary Education major in Sciences.
Sa eksklusibong pakighinabi sa Bombo Radyo Butuan, gipadayag ni RJ nga dakong tabang sa iyang mga ginikanan ilabina alang kaniya nga nahimo siyang full scholar sa Agusan del Norte Electric Cooperative kon ANECO kondiin sa entiro upat ka tuig niyang pagtungha, eskwelahan, trabaho ug boarding house ang kanunay niyang routine.
Duna matud pa’y mga higayon nga halos musurender na siya tungod sa kalisod sa iyang mga giisagubang, apan malabwan ra kini sa iyang ambisyon nga mu-asenso ug makatabang sa iyang kabus nga pamilya ilabina nga walo silang managsoon ug siya ang ikaduha.
Aminado siyang dili siya utukan apan kanunay lang nga magtuon rason nga iya matud pang nakab-ot ang iyang na-abot karon taliwa pa man sa mga hagit nga iyang gi-atubang ilabina dihang na-igo sa COVID-19 pandemic ang nasud ug duna’y kalit nga ka-usaban sa ilang mga klase.
Samtang mas dakong garbo alang sa iyang mga ginikanan ang iyang nakab-ot tugod kay wala niini gihimong babag ang ilang kakabus sa iyang nakab-ot nga kalampusan.
Aminado ang inahan niiing si Buday nga gawas nga buutan kini, studios pa ug masinabtanon pa.
Matandog matud pa siyang magtan-aw sa iyang anak nga kung wala’y mahatag nga allowance, kinina mismo ang magpas-an og sinakong abot sa ilang gitikad nga umahan aron ibaligya ngadto sa iyang mga ka-ubanan sa trabaho diin siya nag-workig student.
