BUTUAN CITY – Usa ka lalaki sa California ang nawad-an og parte sa iyang bagul-bagol tungod sa sobrang pag-inom og energy drinks.
Sa usa ka gi-delete na nga post diha sa Facebook page alang sa Endres Photography sa Sacramento, California, gipasabot sa babayeng nagpa-ila lang nga si Brianna kung unsa ang nahatag nga kada-ut sa sobrang pag-inom og energy drink ngadto sa iyang bana nga hapit pang mukutlo sa kinabuhi niini human nagka-brain hemorrhage dihang na-aksidente.
Sigon ni Brianna, nagsugod pag-inom ang iyang banang si Austin og energy drinks dihang nagsugod kini og trabaho nga sige lang og overtime ug mag-commute pa.
Usa ka adlaw, gipukaw na lang siya sa iyang ugangang babaye og gipahibalo nga na-aksidente si Austin ug dinhi na niya nasayran nga duna na kini brain hemorrhage ug na-coma na.
Human gipa-ilalom sa toxicology screening ug nasutang wala kini maka-drugs, nasuta sa mga doctor nga ang sobrang pag-inom niini og energy drink mao ang tuburan sa nasangpit nga problema.
Tungod sa aksidente, naka-angkon og ubay-ubay nga brain injuries si Austin apil na ang wala la-uming mga strokes, seizures, ug paghubag sa utok.
Tungod niini, gitangtang na sa mga doktor ang frontal portion sa iyang bagul-bagol kondiin niadtong panahuna, mu-anakay na ang iyang asawa.
Tuod man, tungod sa gihimong operasyon sa mga doktor, buhi pa karon si Austin og normal nga makalihok-lihok bisan og wala na ang katunga sa iyang agtang ug bagol-bagol.
