BUTUAN CITY – Padayong nagserbisyo sa katawhan ning siyudad sa Butuan ang water treatment facility gikan sa Local Water Utilities Administration kon LWUA ubos sa ilang proyektong Task Force Odette ‘Working As One and Helping As One’.
Sigon ni Ramon Peralta, sa Local Water Utilities Authority kon LWUA ang maong pasilidad, migamit sa tubig gikan sa Bonbon River tungod sa ka-abunda ug kalimpyo niini kansa maoy giproseso aron luwas nga mahatag sa mga tawo sa ingon duna sila’y limpyong tubig ma-inom.
Sa eksklusibong pakighinabi sa Bombo Radyo Butuan, gipadayag ni Peralta nga magpabilin ang maong pasilidad sa may Brgy. Bonbon hangtud nga wala pa’y kapasidad nga makahatag og limpyong tubig ma-inom ang Butuan City Water District kon BCWD.
Ang nasangpit nga water treatment facility kayang maka-produce og 30 hangtud 40-litros nga limpyong tubig ma-inom kada-segundo.
Pwede matud pang mapalit ang maong pasilidad sa city government kung gustuhon tungod kay dakong tabang kini ilabina panahon sa kalamidad sama sa nahitabo human ang dakong epektong hatud sa bagyong Odette.
Ang ingon niini nila nga mga facilities, ilang gimontar sa tanang mga lugar nga na-igo sa bagyong Odette ug apektado ang supply sa ilang limpyong tubig ma-inom.
Nasayrang siyam ka tubo ang built in sa maong water treatment facility rason nga pagpas ang pagproseso sa limpyong tubig kondiin sa pagkakaron, mi-abot na sa 1,389-cubic liters nga tubig ang ilang naproseso.
Samtang dako ang pagpasalamat sa mga Butuanon nga nakabenepisyo sa libreng tubig nga gitunol sa Local Water Utilities Administration kon LWUA human ang paghapak sa bagyong Odette.
Sigon ni Leo Lumagbas, residente sa Brgy. Villa Kananga, kung wala ang libreng water supply sa LWUA, dako ang posibilidad nga maka-abot unta dinhi sa dakbayan sa Butuan ang mga kaso sa diarrhea, acute gastroenteritis ug dehydration kung wala pa ang serbisyong gihatag sa LWUA pinaagi sa pagpagamit sa ilang water treatment facility.
Samtang gipadayag sa taga-LWUA nga wala’y limit ang pagpanghatag nila og libreng tubig bisan og duna’y magdala og mga kinontiner na nga ikarga og sakyanan.
Apan kung duna’y magdala og pila lang ka galoon, ila kining unahon pag-facilitate aron dili maghulat og dugay kung kanus-a mapuno ang gipangkargahan sa uban nga mga dinaghang containers.
