BUTUAN CITY – Anaa pa gihapon sa alert level 3 ang mga lugar palibot sa Mt. Semeru sa East Java sa Indonesia human ang major eruption niini niadtong Dominggo nga mikalas na og kapin 30 ka mga tawo.
Sa eksklusibong pakighinabi sa Bombo Radyo Butuan kang Bombo international correspondent Pastor Jerson Labadia direkta gikan sa East Java, Indonesia, gipadayag niining padayon gihapon ang ginagmay nga volcanic activities sa Mt. Semeru ug ang alert level 3 gipatuman aron dili una mubalik sa ilang pinuy-anan ang mga gipanghikling.
Tungod sa padayong pagbuga og abo sa bulkan, delikado pa gihapon sa mud flow ang mga lugar nga anaa sa 8-kilometros nga radius ilabina nga padayon karon ang pag-ulan sa ilang lugar nga ubanan pa sa buhawi nga naka-apekto sa search and rescue operations.
Kung hisgutan matud pa ang aksyon sa gobyerno sa Indonesia, paspas ang ilang pagresponde ilabina sa paghikling sa mga apektadong residente.
Hinuon duna matud pa ‘y ubang barangay nga dili na madala pa sa rescue operation tungod kay delikado na human napalibutan na sa lahar nga delikado pang mahimong lahar flow tungod sa padayong mga pag-ulan.
