BUTUAN CITY – Ilubong na karong Sabado, Nobyembre 20 sa alas-nueve sa buntag ang abo ni Jorge ‘Ka Oris’ Madlos sa Surigao Memorial Park sa Surigao City human unya sa upat ka gabiing pag-vigil niini.
Nasayrang mi-abot ang abo sa rebeldeng lider sa Surigao City gikan sa Bukidnon niadtong Nobyembre 11 ug gidala pa sa General Luna sa Siargao Island, Surigao del Norte diin siya nagdako ug gibalik kini sa Surigao City kagahapong adlawa ug gihaya sa usa ka punerarya sa maong siyudad atbang sa Bilang-Bilang Church.
Sa eksklusibong pakighinabi sa Bombo Radyo Butuan kang Bombo Surigao correspondent Roel Catoto kinsa kababayan ni Ka Oris, duha ka gabii siyang gihaya sa panimalay sa iyang foster father sa General Luna nga si late General Luna mayor Mauricio “Oris” Ravelo, kansang daghany maoy gigamit sa namatay isip nom de guerre kon iyang takuban.
Nasayrang ang namatay’ng mayor, wala’y anak uban sa asawa niining iyaan ni Ka Oris hinungdan nga gisagop kini dihang usa ka tuig pa lang siya.
Sigon matud pa sa manghod ni Ka Oris nga si Anne Madlos-Caraballe, ang abo niini gisulod sa walo ka kilong marble jar ug gi-display sa hawanan sa ikaduhang andana sa karaang balay.
Una nang gidala ang iyang abo sa beachfront property nga napanunod ni Ka Oris gikan sa iyang mga foster parents.
