BUTUAN CITY– Nabutang pa gihapon sa High Risk ang tibuok lalawigan sa Surigao del Sur kung basehan ang National Standard Average Daily Attack Rate Computation kon ADAR sa COVID-19.
Alayon niini subling gimando sa Provincial Health Office kon PHO sa Lalawigan sa Surigao del Sur ang gilayong pagreport ug pag – Quarantine sa tanang mga mouli sa probinsya gikan sa ubang lugar tungod na usab sa padayon nga pagsaka sa mga kaso sa COVID-19 ilabi na usab ang hulga sa delta variant.
Sumala kang Dr. Eric Montesclaros, Provincial Health Officer sa probinsya, nga direkta niining gipahimangnuan ang tanang mga Barangay Health Emergency Response Teams kon (BHERTs) nga himuon ang mga gimando ilabina ang pagmonitor sa mga muoli sa maong lalawigan gikan sa mga High Risk Areas sa nasangpit nga virus.
Sumala pa, tungod sa sitwasyon karon angayan lamang nga subling hugtan ang pagpatuman sa mga quarantine protocols ilabi na sa mga local government units alang sa mga mouli sa ilang mga lugar.
Gawas niini,giawhag usab niini ang mga LGUs nga subling pangitaan og RT-PCR Test Result ang mga gustong mosulod sa ilang nasakupan labi na kung gikan kini sa mga lugar nga adunay taas nga kaso sa COVID-19 ug ang istriktong pagpatuman sa LGU-Facility Quarantine.
