BUTUAN CITY – Magpahigayon og parallel investigation in aid of legislation ang Sangguniang Panlungsod sa Butuan City kalabot sa pagdunggo ug kalit nga pagbiya sa tug boat Clyde ug barge Claudia nga duna’y kargang 20 ka mga tripolante gikan sa Indonesia kondiin 12 sa mga niini ang nagpositibo sa COVID-19.
Sa eksklusibong interview sa Bombo Radyo Butuan, gitin-aw ni Butuan City administrator Rey Desiata nga wala’y nagpahibalo sa city government kalabot niini hangtud nga gitawagan na lang sila sa Department of Health (DOH) Caraga ug gipahibalo kalabot sa 12 ka mga crews nga mga COVID-19 positive na diay.
Gusto sa city government nga manubag ang mga angayang manubag rason nga nangayo sila karon og incident reports gikan sa mga hingtungdang government agencies sama sa DOH, Bureau of Customs, Bureau of Quarantine ug Philippine Ports Authority (PPA) aron magpasabot kalabot sa hilom nga pag-abot ug pagbiya sa maong barko taliwa sa kamatu-urang nagpatuman og travel ban ang Pilipinas batuk sa Indonesia tungod sa taas nilang kaso sa Delta variant.
Samtang sa contact-tracing, gipadayag sa opisyal nga sa mga naka-close contact sa mga COVID-positive crews, usa na lang ang wala makuha ug kini mao nagmaneho sa bangka nga gisakyan sa usa ka tripolanteng mikanaog ug mipa-uli padulong sa Zamboanga City.
Nanghinaut si Desiata nga maila na kini aron ilang makuha ug ma-isolate apil na ang tricycle driver nga gisakyan sa tripolanteng nagmerkado.
