BUTUAN CITY – Pursigido ang probinsyal nga panggamhanan sa Surigao del Norte nga kasuhan ang unom ka mga taga-Luzon nga misulod sa maong lalawigan taliwa nga apil ang ilang lugar sa NCR+ Bubble.
Sa eksklusibong pakighinabi sa Bombo Radyo Butuan, gipadayag ni provincial administrator Sim Castrence nga nalutsan sila sa maong mga indibidwal gamit ang peke nga RT-PCR negative result, taliwa sa hugot nga border control nga ilang gihimo.
Gusto ni Governor Francisco ‘Lalo’ Matugas nga kasuhan ang maong mga indibdiwal aron maleksyon ilabina nga sila nagpuyo sa lugar nga wala gitugutan ang paggawas sama sa National Capital Region, Bulacan, Cavite, Laguna ug Rizal.
Anaa na sila karon sa quarantine facility samtang gihulat ang resulta sa ilang gipa-ilawmang swab test.
Dugang ni Castrence, ma-negatibo man o positibo ang resulta sa ilang swab test, ipadayon gihapon sa probinsya ang pagpasaka kanila og kaso tungod kay makonsidera silang hulga sa panglawas sa mga Surigaonons tungod sa lugar nga ilang gigikanan kansa ilalom sa Enhanced Community Quarantine kon ECQ.
Nabalaka ang probinsyal nga panggamhanan nga tungod sa paglusot sa maong mga indibidwal, dako ang posibilidad nga nakasulod na usab sa ilang lalawigan ang laing variant sa COVID-19.
