BUTUAN CITY – Hangtud sa pagkutlo niini nga balita, wala pa gihapon napalgan sa kapulisan sa lungsod sa Nasipit, Agusan del Norte ug mga opisyal sa Brgy. Culit ang usa ka 9-anyos nga batang si Jenelyn Nuñez, usa ka special child kinsa nagpuyo uban sa iyang apuhan, human kini nag-inusara pagpa-uli niadto pang mi-aging Miyerkules, Marso 3.
Sa eksklusibong pakighinabi sa Bombo Radyo Butuan, gipadayag ni Culit Brgy. Kapitan Joel Pepito, niadtong Martes pa lang, Marso 2, mi-uban ang biktima sa mga bata didto sa bukirang bahin sa Sitio Tagbabacon apan dihang gimingawan pagka-Miyerkules, nananghid matud pa kining mupa-uli sa iyang lola sa ubos nga bahin sa sitio ug nagsugod pagbaklay pasado alas-onse sa sayong udto apan wala kini maka-abot.
Dinhi na nila gilusad pagka-Huwebes ang search and rescue operation uban sa mga barangay tanod ug mga volunteers kondiin ila nang gisuhid ang lasang nga gipadayon nila sa paglabay pa sa pipila ka mga adlaw uban na sa mga pulis apan wala gihapon kini mapalgi.
Tungod kay insaktong usa ka semana na karong adlawa sukad sa iyang pagkahanaw, daghan na nga mga panaghap ang mitumaw nga posibleng nadangatan niini apan padayon gihapon ang ilang search operation nga gi-apilan na sa ukbay-ubay nga mga residente sa ilang barangay.
