BUTUAN CITY – Tumang kalipay ang gibati ni Paul Cabrera, kanhi hepe sa Permits and Licenses Division ning siyudad sa Butuan nga na-abswelto siya sa kasong gipasaka sa Ombudsman batuk kaniya human ang pagkasunog sa Novo Jeans and Shirts Enterprises ning siyudad niadtong Mayo 9, 2012 nga gikamatay sa 18 ka mga empleyado niini.
Sigon ni Cabrera, una nang nagpagawas og guilty verdict ang Ombudsman ngadto kaniya isip hepe sa maong dibisyon niadtong panahon nga nasunog ang nasangpit nga establisamiento rason nga midangop siya sa Court of Appeals.
Ang gi-attach niyang ebidensya ug testimoniya kalabot sa kawala’y gidusong rekomendasyon sa Bureau of Fire Protection kon BFP-Butuan ngadto sa buhatan sa mayor nga duna’y deperensya ang maong establisamiento ang nagpadaog kaniya sa maong kaso.
Saysay pa ni Cabrera, duha ka buwan pa lang adiser ang sunog, gi-inspect na kini sa mga personahe sa BFP-Butuan kondiin nag-isyu pa sila og fire safety inspection certificate taliwa nga duna’y deperensya o daut sa maong tindahan.
Ang maong testimoniya maoy gihimong basehan sa Court of Appeals naghukom kaniyang dili guilty sa kaso niadtong June 19, 2020 ilabina nga dili trabaho sa iyang gipangunahang buhatan ang pagsusi sa mga dakbalay.
Mi-abot matud pa og ingon niini kadugay ang pagpa-abot niya sa hukom tungod kay gipa-abot pa nilang magduso og motion for review sa desisyon sa CA ang Ombudsman sa desisyon nga gipagawas sa CA niadtong Hunyo ning mi-aging tuig ug ang finality of judgement kon entry of judgment nga niadto pang Enero 19 ning tuiga gipagawas.
Karong ang desisyon pabor na kaniya, mala-umon si Cabrera nga mabalik na kaniya ang iyang binulang pensyon nga naputol human ang desisyon sa Ombudsman.
Hinuon, giklaro niining duna gihapon siya’y nadawat nga mga benepisyo dihang nagdesisyon siyang mag-early retire.
