BUTUAN CITY – Nagmalampuson sa kinatibuk-an ang ikaduhang adlaw nga tagging sa lokal nga kagamhanan ning syudad ngadto na sa mga balay nga nasulod sa luna nga napalit na sa CAR-BDP gikan sa mga orihinal nga tag-iya niini sa Purok 9 sa Barangay Maug ug Purok 4 sa Barangay Bansa ning dakbayan sa Butuan.
Madumduman nga ang maong luna apil sa gi-angkon sa nagpa-ilang tribung Lapaknon nga ila matud pang yutang kabilin rason sa pagpangayo nila og binuwang bayad sa mga nagpuyo niini. Kini taliwa sa kawala nila’y gihuptang mga pertinenteng dokumento nga magpamatuod niini sukwahi sa panig sa city government nga kompleto.
Taliwa nga walay kakulian nga nahitabo human ang tagging sa nasangpit nga mga barangay, duna gihapo’y nahitabong tinubagay.
Kini human mipalag ang gitawag nilang sumpremo sa Tribung Lapaknon nga si Reynante Asaytona dihang gipasabot sa taga city hall nga sayop ang pangolekta nila og kwarta ngadto sa sa mga residente kansa wala misubay sa protocol samtang gipamugos ni Asaytuna nga wala’y abiso kaniya ang gihimong tagging sa lokal nga kagamhanan ning syudad.
Una nang gipamugos sa tribung Lapaknon nga aduna matod pay sila’y kaugalingong gobyerno nga mao usab ilang gi-basehan sa pagpangolekta og kwarta. Apan dihang gipangitaan si Reynante og papeles kung lehitimo ang ilang tribu kini ang iyang tubag.
Una nang gipasabot ni kanhi National Commission on Indigenous People kon NCIP-Caraga Regional Director Ferdausi Cerna nga sa pinakaulahing report, wala nila gi-ilang lehitimong tribu ang mga Lapaknon ug ang gipamugos sa mga niini nga self governance nasayop lang pagsabot sa mi-angkong tribu.
Gipasabot usab ni Cerna nga bisan dili lehitimong tribu ang mga niini wala hinuon nagpasabot nga wala sila girespeto ug nagtunhay.
