BUTUAN CITY – Napatay sa kapulisan sa Regional Intelligence Division kon R-II sa Police Regional Office kon PRO-13 ang usa ka gun-for-hire kinsa taud-taud nang wanted sa Naga City, Cebu human matud pa misukol atol sa ilang pag-serve sa arrest warrant kaganinang buntag.
Naila ang napatay nga wanted person nga si Jeffrey Caparida, kinsa nagpa-ila sa maong dapit nga si Victor Uy hingkod ang edad, minyo ug upat ka tuig nang nagpuyo sa dapit nga nahitabuan sa Purok Papaya-B, Brgy. Basag ning siyudad sa Butuan.
Sigon ni PCaptain Jayward Dulatre, mag-serve na unta sila og arrest warrant batuk sa suspek sa kasong murder nga gi-isyu sa Regional Trial Court, 7th Judicial Region, Branch 76 sa Naga City, Cebu tungod sa iyang pagpatay sa usa ka police investigator ug laing lima ka mga sibilyan.
Dihang ilang na-atubang ang suspek kaganinang sayo sa buntag, kalit lang kining mibunot ug nakapabuto pa sa iyang kalibre .38 nga pistola rason nga gipusil usab kini sa operating team nga miresulta sa iyang kamatayon.
