BUTUAN CITY – Nagpadayag sa iyang ka-andam si kanhi Butuan City Councilor Sergio Pascual nga mahimong lead convenor sa katawhan ning siyudad nga gustong muhimo og people’s action batuk sa minos nga aksyon sa kasamtangang mga city officials sa kasamtangang COVID-19 pandemic pinaagi sa petition for recall.
Una nang gipadayag sa kanhi opisyal nga daghang mga Butuanon ang nadismaya sa kawala’y transparensiya sa kasamtangang administrasyon kalabot sa gipadulngan sa lokal ug nasudnong pundong gitagana isip COVID-19 response.
Sa eksklusibong pakighinabi ning sibyahan, gibutyag ni Engr. Pascual nga mahimo matud pang basehan sa idusong petition for recall ang nawalang pagsalig kon lost of confidence sa katawhan ngadto sa mga kasamtangang opisyal ning siyudad.
Base sa balaud, mamahimo nang petisyunan sa katawhan ang mga napiling local officials, usa ka tuig human ang eleksyon ug usa ka tuig adiser ang umalabot nga eleksyon.
Dinhi sa dakbayan sa Butuan, masulod matud pa kini sa number 3 sa Section 70 sa Local Government Code nga nagkinahanglan og 15-porsiento sa voting population sa usa ka local government unit kon LGU nga duna’y 75-mil nga voting population ug dili mulapas sa 300-mil ilabina nga 214-mil ang mga rehistradong botante ning siyudad.
Kini ang lig-ong basehan nga mamahimo nang maduso ang maong petisyon kung duna’y 35-mil ka mga botanteng mupirma niini.
