BUTUAN CITY – Tulo ka mga lungsod sa Agusan del Sur ang nakadawat og milyunes pesos nga balor sa tseke gikan sa probinsyal nga kagamhanan aron magamit sa nagkada-iyang mga proyektong gitagana alang ning tuiga.
Mismong si Governor Santiago Cane Jr. ang mitunol sa 6-milyunes pesos nga balor sa duha ka tseke ngadto kang Trento Mayor William Calvez kansa gikan sa general ug provincial development funds sa probinsya.
Ang 5-milyunes pesos niini gamiton alang sa pag-instalar og street lights sa main roads sa lungsod samtang ang nahabiling usa ka milyon ka pesos, gamiton usab alang sa pagsemento sa NRJ-Poblacion–Gasa-Tudela road.
Gitunulan usab sa gobernador si San Luis Mayor Phoebe Corvera og 3-milyunes pesos alang sa konstruksyon sa municipal tribal house kansa dugay nang gidamgo sa mga tribal leaders aron duna’y magamit sa ilang mga panagtigom ug duna usa’y ka-istaran kung dili sila maka-uli higayong mudalikyat sila sa Barangay Poblacion.
Samtang usa ka milyon ka pesos usab ang natunol ngadto kang San Francisco Mayor Solomon Rufila aron gamiton usab alang sa konstruksyon sa Magaud-Maitom road samtang laing usa ka milyon ka pesos usab alang sa pag-instalar sa ilang mga street lights.
