BUTUAN CITY – Seguradong daghang mga abogado og human rights advocate ang mudangop sa Korte Suprema aron kwestyunon ang constitutionality ugaling hingpit nga pirmahan ni Pangulong Rodrigo Duterte ang bag-ong napapasar nga Anti-terrorism Bill.
Kini ang gipadayag ni Butuan City ug Agusan del Norte 1st District Representative Lawrence Lemuel Fortun, usa sa 31 ka kongresistang mibotar og ‘NO’ sa maong sugyot-balaudnon.
Sa eksklusibong pakighinabi sa Bombo Radyo Butuan, gipasabot sa abogadong kongresista nga mibutar siya supak sa Anti-terrorism Bill tungod kay daghang mga probisyon niini ang dili klaro ug dakong risgo gawas nga delikado pa sa tawhanong katungod.
Partikular niining gitumbok ang Section 39 diin pwede nang dakpon ug prisuhon ang masuspetsahan bisan og wala pa’y warrant of arrest kansa ,mas grabe pa kaysa martial law tungod kay pwedeng mapriso ug 24 ka mga adlaw ang gisikop taliwa nga wala pa kini’y gi-atubang nga kaso.
Dili susama sa martial law nga mu-abot lang sa 72 oras ang pag-detain sa dinakpan ug buhian ra ugaling wala’y mapasakang kaso.
Ikaduhang gitumbok niini ang probisyon nga pwedeng prisuhon sulod sa 12 ka tuig ang bisan kinsang miyembro sa teroristang organisasyon bisan og kini wala’y nabuhat nga sala.
Sumala pa ni Congressman Fortun, mas daghan pang mga legitimate organizations ang pwedeng ikonsiderang terrorist organization nga duna’y daghang mga miyembrong mga inosente rason sa mga kabalakang posibleng mawala ang kagawasan sa pagpadayag kung kini ipatuman na.
