BUTUAN CITY – Nag-public apology na si Director Brielgo Pagaran ngadto sa Butuan City government ilabina kang Mayor Ronnie Vicente Lagnada sa iyang sakit nga post sa iyang Facebook account nga maoy gihimong basehan sa city council pagdeklara kaniyang persona non-grata.
Sa eksklusibong pakighinabi sa Bombo Radyo Butuan, gibutyag ni Director Brielgo Pagaran nga tuburan niining tanan mao lang ang isyu sa enhanced community quarantine kon ECQ ug general community quarantine kon GCQ.
Iyang giklaro nga ang wala niya uyuni mao ang pagpamugos sa city government nga ipa-ilalom ang 50 ka mga barangay ning siyudad sa enhanced community quarantine nga susama ra matud pa nga ang tibuok Butuan na ang gi-ECQ tungod sa kadaghan niini kumpara sa 36 lang nga gipa-ilalom sa GQC.
Alang kaniya, angayan matud pang sundon sa lokal nga kagamhanan sa Butuan ang mando sa Inter-Agency Task Force for the Maintenance of the Emerging Infectious Diseases kon IATF-EID nga i-GCQ na ang siyudad tungod kay apil kini sa gi-classify sa IATF nga low-risk area.
Iyang gidugang nga duna pa’y daghang angayang mahimo sa city government bisan og kini naka-GCQ.
Giklaro usab niining wala siya’y personal nga kasuko kang Mayor Lagnada tungod kay base sa iyang nasayran, usa kini ka maayong negosyante ug maayong tawo.
Gawas pa, wala usa’y malisya ang iyang post tungod kay personal lamang niya kini nga opinyon dungan sa pagpasabot nga nangayo na sila og pasaylo sa mga tawong nasakitan sa iyang post ilabina sa mga opisyal ning siyudad nga gisundan pa niya og public apology eksklusibo dinhi lamang sa Bombo Radyo Butuan.
