BUTUAN CITY – Nagtoo ang practicing lawyer nga Atty. Froilan Montero nga wala nahasubay sa balaod ang pagpa-ilalom sa 50 ka mga barangay ning siyudad sa Butuan sa Enhanced Community Quarantine kon ECQ.
Aminado si Atty. Montero sa eksklusibong pakighinabi sa Bombo Radyo Butuan nga adunay katungod ang lokal na kagamhanan pag-extend sa ECQ sa pipila ka barangay kung kini tugutan sa Regional IATF base sa nakalatid sa EO 112 nga epektibo niadtong April 30.
Apan sigon sa abogado nakalatid usab sa maong EO nga pwedeng bakwi-on sa IATF ang ECQ extension.
Gipasabot ni Atty. Montero nga sa pag-basura sa IATF sa request sa Butuan CIty-LGU nga i-extend ang citywide ECQ, apil matud pa sa gibasura niini ang pag-extend sa ECQ sa 50 ka barangay ilabina nga wala’y gipakita nga dokumento aron kini tugutan.
Gihimo niining basehan ang video-interview ni Sec. Ano dhang gipadayag niining tawgon lamang nga “targeted contained area” ang barangay nga adunay positive cases o transmission diin dinhi sa Butuan, tulo lamang ang positive cases kondiin nagnegatibo na ang usa rason nga tulo lang ka barangay ang i-contain.
Tungod sa pagpa-ilalom sa 50 ka barangay sa extended ECQ, dili na mahimo sa mga residenteng supermajority sa population ang tumong sa GCQ nga essential movement sa trabaho ug pagpalit sa kinahanglanon.
Gipasabot pa sa abogado nga apil sa kalahi-an sa GCQ ug ECQ mao ang tsansa sa mga trabahante sa private sector nga makatrabaho og balik gamit ang new normal sama sa distancing ug paggamit sa mask ilabina kadtong mga apektado sa ‘no-work, no-pay” policy.
Gidugang pa ni Montero nga base sa kasinatian atol sa ECQ, dili tanan nakadawat ug hinabang apan kung nakadawat man, gamay lang kini kumpara sa ubang mga LGUs rason nga ang GCQ lang ang ilang paglaum nga mabuhi ang ilang pamilya.
Kwestyon pa niini nga kung ang Cagayan de Oro wala mibalibad sa mando ni Pres. Duerte nga mag-GCQ bisan aduna sila’y upat ka kumpirmadong positive cases ug ubay-ubay nga suspect cases, wala’y rason nga dili kini sundon sa Butuan City-LGU nga duna na lama’y duha ka mga kumpirmadong positive cases.
