BUTUAN CITY – Gikonsidera nang solve ang natigayong pagpamusil sa Portapique, lalawigan sa Nova Scotia sa Canada human nga napatay sa ginukdanay ang gunman kinsa una nang nakapusil-patay og 18 ka mga tawo.
Kini ang gikumpirma ni Rodge Cultura, kanhi presidente sa National Union of Journalists of the Philippines kon NUJP-Butuan City/Agusan del Norte ug atua na nagpuyo sa maong nasud.
Sa eksklusibong pakighinabi sa Bombo Radyo Butuan, gibutyag ni Cultura nga mi-abot og 12-oras ang pagpamusil tungod sa pagtago-tago sa 51-anyos nga gunman nga si Gabriel Wortman rason nga gipangita pa kini hangtud nga na-corner na siya sa gasolinahan sa gilay-ong 34-kilometro sa Halifax nga sentro sa capital Nova Scotia.
Wala pa’y klaro sa pagkakaron kung ang pagkamatay sa gunman mugna ba sa iyang pagsukol rason nga gipusil o kaha patay na kining daan dihang anaa sa kodstudiya sa kapulisan.
Dugang ni Cultura, ang nasangpit nga panghitabo naghatag og dugang kakuyaw sa mga Canadians kinsa daan nang kabado tungod sa nagkataas nga ihap sa mga kumpirmadong kaso ug namatay tungod sa COVID-19.
Gisuta pa usab niini kung duna ba’y nadamay nga Filipino sa maong hitabo ilabina nga daghang mga Pinoy nurses sa nasangpit nga lalawigan tungod sa kasayon lang magparehistro dinhi kumpara sa ubang lugar sa Canada.
