BUTUAN CITY – Human ang pila ka adlaw nga pagpakahilom kalabot sa kagubot nga natigayon atol sa haya sa iyang amahan, nagpagawas na og pamahayag ang aktres nga si Marjorie Barretto aron madunggan iyang panig kalabot sa away nila sa iyang mga igsoong sila Gretchen ug Claudine Barretto.
Gipanghimakak niini ang mikaylap sa duha nga siya ang nagpasi-ugda sa kagubot dihang gitunol ni La Greta ang iyang kamot alang unta sa ilang paglamano base na sa hangyo ni Pangulong Rodrigo Duterte.
Gibutyag niining nagsugod ang tensyon dihang iyang nakita si Claudine nga gitawag si Gretchen ka-uban si Atong Ang nga gika-ingong nahimong hinigugma sa iyang pag-umangkong si Nicole og gi-ilog matud pa ni Claudine.
Gi-angkon usab ni Marjorie nga si kanhi Caloocan Mayor Recom Echiverrie ang amahan sa iyang kamanghurang anak dungan sa pagklarong dili matud pa tinuod nga gimolestiya niini si Claudine og iyang mga anak sama sa mga pasangil ni Gretchen.
Gipasabot usab niini nga dili tinuod ang gipasi-atab sa iyang mga igsoon nga siya ang hinungdan sa kamatayon sa ilang amahan human nga wala matud pa niya gi-imbitar ang ilang inahan atol sa birthday sa namatay.
