BUTUAN CITY – Gideklara nang drug cleared ang tibuok probinsiya sa Agusan Del Sur ning rehiyon sa Caraga atol sa gipahigayong 16th Barangay Drug Clearing Regional Oversight Committee meeting kagahapong adlawa sa opisina sa Philippine Drug Enforcement Agency kon PDEA-13.
Sa pakighinabi sa Bombo Radyo Butuan, gipadayag ni PDEA-Caraga Assistant Regional Director Irvin John Coderis nga naka-comply sa tanang rikisitos ang tanang barangay nga sakop sa probinsiya aron mahimong drug cleared .
Tungod niini, kini na ang ikatulong lalawigan ning rehiyon nga nadeklarang gawasnon sa ilegal nga drugas sunod sa Dinagat Island ug Surigao Del Sur.
Gikumpirma usab ni Coderis nga ang rehiyon sa Caraga ang dunay pinakadaghang barangay sa tibuok nasud nga nadeklarang drug cleared ug gipasalamatan niya ang tanang stakeholders ug partner agencies nga mihatag og suporta sa kampanya kontra sa ilegal nga druga.
Lakip sa palisiya nga kung dunay makitang bag-ong misulod nga nagdula sa ginadiling buhat, kinahanglan kining ireport sulod sa 30 ka adlaw ug kinahanglang gikan sa barangay ang impormasyon diin pwede sila mismo ang mohimo og aksiyun.
Apan giklaro sa opisyal nga padayon gihapon ang pagmonitor nila sa mga lugar nga nadeklarang drug cleared base sa Dangerous Drug Board Regulation Number 3 series of 2017 nga maoy nagmugna sa Barangay Drug Clearing Program, dunay himoong re-validation sa mga lugar sa matag-kwarter.
Mamahimo usab nga isumbong nila sa kapulisan aron malusad ang illegal drug operation.
Nagbahad usab ang opisyal nga sampolan nila pinaagi sa pagpasaka og kaso ang mga barangay opisyales nga mibalewala sa programa kontra sa illegal mga drugas.
