BUTUAN CITY – Malampuson sa kinatibuk-an ang usa ka semanang selebrasyon sa 27th Naliyagan Festival nga nagsugod niadtong Hunyo 12 ug natapos kagabii Hunyo 17 sa probinsya sa Agusan del Sur.
Gidagsa sa bagang duot sa katawhan ang ilang kada-adlaw nga mga kalihukan gikan sa mga pasundayag nga nagrepresenta sa kultura sa mga lumad sa maong probinsya ngadto na sa mga gi-imbitar nga mga sikat nga banda ug artista o singer gikan sa kauluhan.
Gidagsa usab ang maong festival sa libuang mga bisita gikan sa nagkada-iyang parte sa nasud ilabina sa Mindanao ug sa Kabisay-an.
Nasayran nga mukabat sa 21-milyunes pesos ang gigahin nga pundo sa probinsyal nga panggamhanan alang sa Naliyagan 2019.
Sa closing activity kagabii, gihimo ang ‘Binaga Tu Naliyagan’ kansa mao ang pagsugba og mga isda og karne nga mi-abot sa sa 1.6 kilometros ang gitas-on og libreng natilawan sa mga bisita samtang mihatg usab og lingaw ang rakistang si Bamboo.
Sumala ni provincial Information officer Alfredo Plaza, duna’y dakong kabag-ohan ang festival karon nga tuig, tungod sa mga gilusad nga aktibidad nga nakahimo usab ug dakong impact ngadto sa turismo ug ekonomiya sa probinsya.
