BUTUAN CITY – Wala na ma-revive pa ang pasaherong mi-ambak gikan sa gisakyan niyang fast cat kagahapon samtang naglawig sa bisinidad sa Balong-Balong Point sakop Pintuyan, Southern Leyte.
Migawas sa inisyal nga imbestigasyon nga lulan sa maong MV Fast Cat M7 ang biktimang si Joana Eviota, 31-anyos, residente sa Sta. Monica sa Siargao Island, lalawigan sa Surigao del Norte dihang kalit kining mi-ambak samtang padulong sila sa Surigao City.
Daling gimando ni Jimuel Arsibal ang pagpangita og pagluwas sa pasahero kondiin narekober gilayon kini og gihatagan og first aid sa ilang medical personnel apan wala na ma-revive tungod sa daghang tubig-dagat nga iyang na-inom.
Duna na’y nag-standby nga rescue team pag-abot nila sa Lipata Port sa Surigao City kondiin daling gikuhaan og vital signs ang biktima apan gideklara kining patay na.
Padayon pang gipakisayran ang hinungdan sa iyang pag-ambak kondiin una siyang nakitang masulub-on samtang duna’y ka-istorya sa iyang cellphone.
