BUTUAN CITY – Maglusad ug lawom nga imbestigasyon ang Department of Interior and Local Government kon DILG batok sa mga nangsulpot karon nga mga investment scams particular ang Kabus Padatuon kon KAPA Community International Ministry sa nasud ilabina sa isla sa Mindanao.
Sa eksklusibong pakighinabi ning sibyahan, gibutyag ni DILG Undersecretary Martin Diño, nga ilang i-review ang pagpatuman sa cease and desist order sa Securities and Exchange Commission kon SEC aron masayran kung gisunod ba kini sa lokal nga panggamhanan apil na sa Philippine National Police og sa National Bureau of Investigation kon NBI.
Giklaro sa opisyal nga apil sa ilang imbestigahan ang ilang mga myembro sa Philippine National Police kon PNP nga nag-invest sa maong mga ilegal nga investment scheme.
Taliwa sa gipakanaog nga advisory sa DILG, giklaro ni USec. Diño nga naghulat lang gihapon sila og mga tawong pormal nga mupasaka og kaso ilabina kadtong mga nabiktima aron mahatagan og aksyong legal sa panggamhanan.
Gibutyag sa opisyal nga dili na bag-o sa nasud ang mga sistema diin makadismaya matod pa nga wala nakat-on ang katawhang Pilipino sa mga nangaging investment scam dungan sa pagbutyag nga nagtunhay matod pa ang maong mga sistema tungod sa kinaiya sa tawo nga nangandoy nga daling ma-adunahan.
Nasayrang dinhi sa Caraga Region ilabina dinhi sa dakbayan sa Butuan, wala gihapo’y gihimong aksyon ang Butuan City Police Office, apil na ang NBI og ang lokal nga kagamhanan ning siyudad batuk sa nagpadayong operasyon sa KAPA.
Gitu-uhan sa kadaghanan nga kini tungod sa pag-invest sa pipila kanila kondiin wala pa nakabawi o kaha nahigam sa ilang nadawat atol sa mga pay-outs.
