BUTUAN CITY – Itumod na sa katapusang pahulayanan karong buntag ang patay’ng lawas ni Police Executive Master Sergeant Jimmer Omisol – ang Municipal Executive Senior Police Officer kon MESPO sa Carmen Municipal Police Station kinsa gipusil-patay sa mga rebeldeng NPA.
Kagabii atol sa necrological service nga gihimo sa chapel sa Police Regional Office kon PRO-13, nahimong emosyunal ang mga kabanay og suod nga higala sa maong opisyal samtang mihatag sa ilang mensahe.
Bisan ang mga ka-batch ni PEMS Omisol nga hepe na sa nagkada-iyang municipal police stations ning lalawigan sa Agusan del Norte, wala makapugong sa pagtulo sa ilang luha.
Sigon ni Carmen Vice Mayor Wilfredo Taglucop, wala sila’y nadawat nga reklamo sa ilang katawhan batuk kang Omisol pamatuod sa kamaayo niining tawo.
Bisan matud pa og dili sila suod apan base sa iyang na-ilhan sa pagkatawo niini, buutang tawo ang maong pulis kinsa wala’y labad tungod kay magpunay lang kini og ngisi.
Gani, gi-ila sa ilang lungsod si PEMS Omisol nga bayani tungod kay didto niya gihalad ang iyang kinabuhi.
Aminado si Vice Mayor Taglucop nga silang mga Carmenanon dako og utang kabubut-on kang PEMS Omisol tungod sa maayong serbisyong gihatag niini ngadto kanila.
Karong alas-otso sa buntag, himuon ang funeral mass adiser ipagawas gikan sa PRO-13 ang patay’ng lawas ni Omisol aron itumod ngadto sa katapusang pahulayanan niini.
