BUTUAN CITY – Nakaplagan na ang patay’ng lawas sa duha ka batang managsuong nahulog og na-anod sa Agusan River ning mi-aging Sabado sa hapon sa Brgy. Baan Riverside ning siyudad sa Butuan.
Unang nakaplagan pasado alas 7 kagahapon sa buntag ang patay’ng lawas ni Nigel Batuiga, 9-anyos, mga 500 metros ang gilay-on gikan sa iyang nahulugan samtang pasado alas 10 sa buntag usab dihang nakaplagan ang patay’ng lawas sa maguwang niining si Patricia 11-anyos sa gilay-ong 300 metros gikan sa incident area.
Sumala ni petty officer 3rd Class Jay Bernales sa Philippine Coast Guard Agusan del Norte sa eksklusibong pakighinabi sa Bombo Radyo Butuan, on board sa ilang sakyanan ang inahan nga si Daisy Batuiga kinsa maoy unang nakakita sa patay’ng lawas sa iyang anak nga lalaki.
Sigon ni Bernales, posibleng nasangit ang patay’ng lawas sa duruha diin nakaplagan lang kini duol sa nahitaboan, taliwa sa kasulog sa sapa ning nakalabay’ng adlaw.
Una nang gikatahong duna unta’y kuhaong anod nga kahoy si Nigel dihang nahulog sa suba ang iyang tsinelas nga gisulayan niya pagkuha apan nahulog siya nga dali usab nga giluwas sa maguwang apan pareho na silang gi-anod sa kusog ng bul-og sa tubig.
