BUTUAN CITY – Padayon pang giberipika sa kapulisan og militar kung kabahin sa usa ka private armed group (PAG) sa usa ka pulitiko ang nadakpang napulo ka armadong kalalakin-an kagahapon sa alas-dies sa buntag sa Brgy. Maribujoc, lungsod sa San Benito, Surigao del Norte.
Sa gilusad nga joint police og military operations, malampusong nadakpan sila Angelito Alegre, Junreyper Parian, Eljim Lauro, Jonathan Compra, Eljhon Baradillo, Reil Larong, Fersan Romei, Jimmy Lauro, Jayson Tabian og Jemimar Peruda.
Nakumpiska gikan kanila ang 14 ka mga armas nga gilangkuban sa siyam ka kalibre .38 nga mga revolvers; duha ka kalibre .45 nga pistola; shotgun; UZI submachine gun; improvised caliber .22 rifle; duha ka mga hand grenades; og mga bala.
Sigon ni Police Regional Office (PRO) 13 Director Brigadier General Gilberto DC Cruz, wala’y napresentang mga dokumento ang mga suspeknga magpamatuod nga lisensyado ang maong mga armas.
Gihimo ang hiniusang operasyon sa Surigao del Norte 1st Provincial Mobile Force Company, 30IB Philippine Army, ug Task Force Siargao human nadawat ang taho sa usa ka nagpakabanang lumolupyo mahitungod sa presensya sa maong mga armadong lalaki.
