BUTUAN CITY – Andam matud pang mutuman sa kamanduang gipagawas sa Securities and Exchange Commission kon SEC ang Butuan City Police Office kon BCPO kung pangunahan kini sa mga sakop sa SEC og sa local government unit ning siyudad.
Kini ang giklaro ni P/Sr. Insp. kon Police Captain Emerson Alipit – tigpamaba sa BCPO human gisukna sa Bombo Radyo Butuan sa lakang nga ilang gihimo base na sa pag-deputize sa SEC kanila aron pa-undangon na ang investment scam nga gihimo sa KAPA International Community Incorporated kansa duna na’y tulo ka buhatan dinhi sa Butuan.
Mahinumdumang ning mi-aging semana, nagpagawas ang SEC-Region 10 og kamanduan nga nag-deputize sa mga local government units kon LGUs diin duna’y operasyon ang KAPA ingon man sa National Bureau of Investigation kon NBI og sa kapulisan aron pahunungon na ang operasyon sa KAPA samtang dakpon ang ilang mga opisyal og mga membrong dili gihapon muhunong sa ilang investment scam.
Gi-angkon na usab ni Butuan City Councilor Omar Andaya nga nadawat na nila ang kamanduan sa SEC apan hisgutan pa nila kini sa iyang mga ka-ubanan sa Sangguniang Panlungsod.
Samtang sa panig sa BCPO, giklaro ni Police Captain Alipit nga wala’y problema kanila ang paghatag og seguridad sa taga-SEC, NBI og LGU higayong ipatuman na ang deputation order sa SEC. (Beth Ruiz)
