BUTUAN CITY – Magtigom pa ang mga local officials ning siyudad sa Butuan aron hisgutan ang nadawat na nilang sulat gikan sa Securities and Exchange Commission kon SEC sa ingon mapatuman na ang cease and desist order batuk sa tanang operasyon dinhi sa Butuan sa Kabus Padatoon kon KAPA International Community Ministries Incorporated.
Sa eksklusibong interview sa Bombo Radyo Butuan kang Konsehal Omar Andaya – Chairman sa Committee on Trade and Industry sa Sangguniang Panlungsod ning siyudad, gibutyag niining nahibalo na sila karon nga gi-deputize na sila uban sa Butuan City Police Office og National Bureau of Investigation kon NBI aron ipatuman ang cease and desist order.
lya matud pa kining giklaro sa SEC og iyang nasayran nga dili lang dinhi sa dakbayan sa Butuan epektibo ang nasangpit nga kamanduan kondili sa tanang lugar sa nasud diin anaa ang operasyon sa KAPA nga gimugna sa nagpa-ilang si Pastor Joel Apolinario. (Beth Ruiz)
