BUTUAN CITY – Padayon pang gipangita sa kapulisan ning siyudad ang usa ka tricycle driver nga mimolestiya sa usa ka grade 1 pupil nga usa sa iyang mga pasahero.
Sigon sa lola sa 7-anyos pa lang nga biktimang gitago lang sa pangalang Inday, iya gilayong gidangop sa Butuan City Police Station 1 human gisulti sa iyang apo kagahapon ang bastos nga gihimo kaniya sa driver kansa ning mi-aging semana pa natigayon.
Sa eksklusibong pakighinabi sa Bombo Radyo Butuan, gipadayag lola nga natingala na lamang siya nga mahadlok nang musakay og traysikol ang iyang apo kondiin sa iyang pagkuti-kuti niini, dinhi na kini mitug-an nga gihikap-hikap matud pa siya sa driver.
Natigayon matud pa kini dihang iya lang gipasakay nga nag-inusara ang iyang apo sa traysikol nga gimanehuan sa batan-on pa nga driver kondiin sa likod nga bahin niya kini giplastar.
Mitug-an ang bata nga gi-una matud pa og hatud sa suspek ang ubang mga pasahero og dihang siya na lang usa, gipabalhin siya sa front seat.
Dinhi na matud pa gisultihan sa suspek ang bata nga dili ihatod sa iyang eskwelahan kung dili pahikapon sa iyang kinatawo og tungod sa kahadlok og kalinghod pa sa panghuna-huna, nahimo sa suspek ang dautan niining binuhatan. (Beth Ruiz)
