BUTUAN CITY – Giklaro ni Philippine Institute of Volcanology and Seismology kon PHIVOLCS Director Renato Solidum nga wala silay nakitang hulga sa tsunami human mihapak ang 6.2 magnitude nga linog sa Burgos, Surigao Del Norte kagabii.
Sumala pa ni Solidum nga dili igo ang maong kakusgon, apan kung makamugna man kini ug tsunami, gelayon usab silang mag-isyu og tsunami information bulletin isip protocol.
Una niini, mitay-og ang 6.2 magnitude alas 11:06 kagabii sa 41 kilometros sa Sidlakan sa Burgos, Surigao Del Norte nga duna’y giladmon nga 16 kilometros ug tectonic ang origin. Nabati ang Intensity V sa Burgos, Surigao del Norte; Surigao City; Dinagat Island og Intensity IV sa Butuan City; Abuyog, Leyte, Hinunangan, San Francisco, San Ricardo, Tacloban City, Southern Leyte samtang Intensity II usab sa Camiguin Island. Sa Instrumental Intensities natala ang Intensity III sa Palo, Leyte; Borongan City; Cebu City; Gingoog City og Intensity II – Argao City samtang Intensity I – Alabel, Sarangani: Cagayan De Oro City; Cebu City; San Francisco, Cebu; Ormoc City.
Hinoon walay gilaumang damyos matud pa sa maong pagtay-og apan nabati na ang daghang mga aftershocks. (RolanJanea)
