BUTUAN CITY – Nakig-alayon na ang Anti-Cybercrime Group sa Police Regional Office kon PRO-13 ngadto sa Butuan City Police Station kon BCPS-3 og mga ginikanan sa Grade 7 student nga biktima sa pagdula sa online game nga ‘Momo Challenge.’
Kini subay na sa pagkaluwas sa teaching staff sa Libertad National High School sa maong babayeng estudyante kinsa naglaslas na sa iyang tuong pulso human nagdula sa maong online app ning mi-aging gabii lang.
Sa eksklusibong pakighinabi sa Bombo Radyo Butuan, gipadayag ni Police Senior Master Sergeant Zena Panaligan, tumong niini nga matun-an og maayo ang maong hitabo go aron ma-trace usab kung asa gikan ang gidulaang ‘Momo Challenge’ og sa unsang paagi kini masanta sa ingon dili na ma-download pa diha sa computers o kaha sa cellphones.
Sa han-ay sa kapulisan, lakip matud pa sa ilang himuong intervention ang pagpa-ilalom sa batang biktima sa ‘Momo Challenge’ sa tambag uban sa psychologist aron mawala ang kahadlok sa iyang nasudlang dula.
Gawas pa kini sa pagpa-ilalom kanila sa psychological examination aron matambagan sila uban sa ilang mga ginikanan sa mga angayang buhaton. (Beth Ruiz)
