BUTUAN CITY – Nalubong na kagahapon ang muabot sa 1,760 ka kilo sa botcha kon double dead nga karneng baboy human nakumpiska dinhe sa siyudad sa Butuan sa nakalabay nga gabii.
Sa pakighinabi sa Bombo Radyo Butuan kang city veterinarian Dr. Mancio Danilo Alegado, gibutyag niining ila gilayong gilubong ang double-dead nga karne sa luyong bahin sa slaughterhouse uban sa presensiya sa duha ka kagawad sa Barangay Obrero.
Sumala pa ni Dr. Alegado, mitawag kanila ang taga-National Meat Inspection Service kon NMIS-Region 10 aron ipahibalo ang posibleng pagdangat ning siyudad sa daghang karneng baboy nga ilegal matud pa nga gi-ihaw.
Sa nakalabay’ng gabii dihang mitawag kanila ang kadumalahan sa Gaisano Mall aron ipahibalo ang daghang karne nga gi-deliver kanila kansa wala nila gidawat taliwa sa pagpamugos pa sa nag-deliver nga sa slaughter house sa Cagayan De Oro City kini gi-ihaw tungod sa kawala nila’y mapakitang meat inspection certificate gikan sa NMIS-Region 10.
Karong adlawa makig-alayon usab sila sa director sa National Meat Inspection Service alang sa kasong ipasaka batuk sa matumbok nga indibidwal. (Rolan Janea)
