BUTUAN CITY – Love triangle ang gilantaw nga anggulo karon sa Butuan City Police Office sa natigayong pagpamusil-patay kaganinang ala-1:30 sa kaadlawon sa may J Rosales Avenue ning siyudad sa Butuan.
Naila ang biktimang si Angelico Casing, residente sa Brgy. Golden Ribbon ning siyudad.
Sigon ni P/Captain Emerson Alipit – tigpamaba sa maong buhatan, duna na sila’y person of interest og ila na kining gipanubayan pinaagi sa paghangyo sa establisamientong duna’y CCTV nga nakakuha sa maong panghitabo.
Sa eksklusibong pakighinabi ning sibyahan, gibutyag ni Captain Alipit nga migawas sa inisyal nga pakisusi sa ilang imbestigador nga nagselos ang biktima sa kostumer sa iyang ka-ipong dancer sa Black Cat night club nga si Gemma Isyang lumad sa Gingoog City tungod kay kini matud pa ang kanunay niining atubangon.
Base sa mga nakasaksi, tulo matud pa ka mga lalaking sakay sa duha ka motorsiklo ang anaa sa gawas nga bahin kondiin ang angkas sa usa ka motorsiklo maoy mipusil sa biktima diha sa iyang likod.
Nakadagan pa og pila ka metros ang biktima apan wala na kini maka-abot pang buhi dihang gidala sa ospital.
Gidugang ni P/Captain Alipit nagpadala na matud pa og feeler ang ilang person of interest aron limpyuhan matud pa ang iyang pangalan human gilambigit sa kremin apan wala kini mipatim-aw.
Ila usab kining gidalikyatan sa dapit nga iyang gitrabahuan apan wala kini didto rason nga padayon pa kining gipangita aron makuhaan usab sa iyang panig. (Beth Ruiz)
