BUTUAN CITY – Gikalipay og dako sa mayor sa Bislig City lalawigan sa Surigao del Sur, ang pagpagawas og cease and desist order sa Securities and Exchange Commission kon SEC batuk sa kontrobersyal nga investment scam nga Kabus Padatoon kon KAPA sa nagpa-ilang pastor nga si Joel Apolinario.
Sa eksklusibong pakighinabi sa Bombo Radyo Butuan, gipadayag ni Mayor Librado Navarro nga wala mulipang sa ilang siyudad ang operasyon sa KAPA tungod kay dihang mibuto gilayon ang isyu batuk niini human ang gibana-banang tunga sa tuig nga operasyon niini, iya gilayon kining gipa-imbestigahan human nakadawat og mga reklamo.
Dihang migawas sa imbestigasyon ang anumaluso niining operasyon, iya gilayong gi-revoke ang business permit sa maong grupo nga gisundan pa sa pagagawas niya og cease and desist order niadtong Marso 1, 2017.
Giklaro pa sa mayor nga ang gipagawas nga cease and desist order sa SEC mao ang bag-o rason nga dili na angayan pang ipangulipas kini sa KAPA og ipasi-atab nga fake news.
Gidugang pa niini nga ang iyang gipagawas nga susamang kamanduan, duha ka tuig na ang nakalabay rason nga naghilom-hilom na siya tungod kay patay na man ang operasyon sa KAPA sa ilang siyudad. (Beth Ruiz)
