BUTUAN CITY – Gipa-imbestigahan na ni Surigao del Norte Rep. Robert ‘Ace’ Barbers ngadto sa Philippine Drug Enforcement Agency kon PDEA ang narekober nga 77 ka bloke sa cocaine nga gibana-banang nagkantidad og dul-an tunga sa milyon ka pesos.
Isip chairman sa House Committee on Dangerous Drugs, gipadayag sa kongresista ang iyang kabalaka nga hayan gihimo nang labayanan sa ginadiling druga ang ilang lalawigan pinaagi sa nga langyaw og local nga mga sindakato sa ginadiling druga.
Gibutyag ni Congressman Barbers nga ang mga ilegal nga drugang narekober sa kadagatan sa ilang lalawigan og sa Dinagat Islands makonsiderang kabahin sa narco-politics tungod kay natigayon kini panahon sa election period.
Iyang gidugang nga ‘open secret’ na matud pa sa ilang lalawigan nga pipila sa ilang mga pulitiko ang nalambigit direkta man o dili, sa mga illegal drugs operations.
Dili matud pa imposibleng huna-hunaon nga ang mga tawong nalambigit niini nga kalihukan, mas mipakusog sa ilang kalihukan aron magamit ang kwartang ilang kitaon sa nagkaduol nga eleksyon karong Mayo 13.
Gihangyo na sa kongresista sila PDEA Chief Director General Aaron Aquino og Philippine National Police kon PNP Chief Director General Oscar Albayalde nga i-establisar ang mga identities niadtong milabay sa nasangpit nga pila ka blokeng cocaine diha sa kadagatan apil na ang barko o kaha bangka nga ilang gigamit og kinsa nga mga tawo sa maong lalawigan ang gipadalhan niini. (Beth Ruiz)
