BUTUAN CITY – Gi-apilan sa mga lokal nga kumunidad, empleyado sa gobyerno, estudyante og volunteers sa tibook Caraga ang simultaneous River Clean-Up activity karung adlawa.
Ang massive clean-up drive nga gipangunahan sa Department of Environment and Natural Resources kon DENR – Caraga, kabahin sa aktibidad sa gilusad nga Rivers for Life Advocacy campaign sa ahensiya aron ipanawagan ang tanan nga moapil sa paglimpiyu sa kasubaan aron malikayan kining mahimong kontaminado.
Lakip sa mga lugar nga gitumbok nga pagalimpiyuhan ang Ambangan ug Montilla Boulevard Creeks sa Butuan City. Ang Cabadbaran River usab sa Cabadbaran City ug Minabang Creek, San Francisco sa probinsiya sa Agusan del Sur.
Sa Agusan del Sur, limpiyuhan ang Taglatawan River sa Bayugan City, Co-o Creek sa Bunawan, Malihaw Creek sa Del Monte, Talacogon, ug Bacay River sa Veruela.
Nanglimpyo usab ang mga Dinagatnons ug Surigaonons sa Navarro River, Tubajon, sa Dinagat Islands; Kinabutan ug Sabang Dos Rivers sa Surigao del Norte ug Cantilan, Lianga ug Tabon Rivers sa Surigao del Sur.
Sa pakighinabi ning sibyahan kang Eric Gallego, Regional Information Officer sa DENR-Caraga, giklaro niining dunay memorandum of agreement nga pirmahan aron masustiner ang paglimpyu sa maong mga bodies of water. (Bombo Rolan Janea)
